幾個月前先忙緊fyp，眨眼之間又到了9月。新學年又開始了半個月，唯一不同的是我今年擺脫了學生的身份。係失業率高企的時勢，我找到工作，真的要感謝上蒼。工作了近一個月，終於有時間為這裡掃掃塵…

朋友問起我的工作，是時候回應一下。新工作與我之前的兼職零關係、讀的科大纜扯唔埋，勉強有關的是與我生活習慣很夾吧。人工不算高，過得去而已。不要問我做咩工，我已經講過一千萬次，知道的就知…唔知的我講多一百次你都唔會明，okay？不過，我蠻喜歡我的工作，無論性質，前景、同事都很對味！(我知道有些朋友讀到這邊已經開始講：「你好好彩呀！」、「你條蛋散不嬲無要求…」)不瞞你說，我真的覺得自己挺好運，一路都遇到好人們！

廢話講完，到正題…近日朋友發生了十萬樣事情…又到力仔講道理時間。

1)工作篇
由8月開始，facebook newsfeed不停出現很多情深句子，「真係好掛住番學呀！」、「番工好辛苦呀…」另加十首友情歌曲(必有頭號偶像古基的友共情！)。諸位的status令力仔無不動容，到了開學日更瘋狂，一上facebook十居其9都係懷念學生身份。都話左人係犯賤的，讀u個時，走堂多過上堂時間，而家要出黎做野先知讀書好。

近期飯局中，親愛的都傾訴工作上的委屈與怨氣。通常，我都係個句：「睇開d啦！番工係咁，慢慢就慣」。我不是不理解你們的感受，朋友可能覺得力仔無壓力，行狗屎運，遇到好人好事、我樂天、我無要求(下刪一百個理由)熟我的，都知我很早已向現實低頭，外頭的世界有幾險惡，我未睇過都聽過。可幸的是，我未遇到，就算遇到我都會扮睇唔到。個個番工番到要大唱「我的天空今天有點灰」又何苦呢？「既來之，則安之」一向都係我的座右銘。凡事有兩面，你覺得你份工辛苦、無撈、無前途？你都起碼叫做有份工，唔駛乞食，對得住阿爸阿媽。又有邊個出黎唔受氣先，你覺得辛苦，先知自己平時有幾幸福。

2)愛情篇
近日朋友們集體中降，紛紛加入失戀大聯盟同分手擂台。唔死的都一身潺，又要生、又要死，又要刀仔拮大脾。又何苦呢？拍拖都係為左開心姐，唔開心拍黎做咩？咪係囉，你自己都唔知為咩。自尋煩惱的人活該，無人可憐的，okay？另外，我想告訴我可愛的朋友，不要對自己失去信心，你是最好的，不用怕他不愛你！

講完d賤人，仲有其他bb豬。我知你知道我講緊你、你同你！(請自行對號入座)情路上跌倒了不要緊，起碼你會發現一個人唔愛你，原來有好多人好愛你，包括我。分開了，你會發現另一片天空。你現在的痛，我感受不了，亦想像不到你的心被掏得有多空。我能做的，是你需要依靠時，給你肩膀、你需要安慰時，給你一個擁抱；你覺得空虛時、不用看鐘，隨時給我一個電話。我們就算不說話，都可以陪你無聊地互聽呼吸聲。不必對愛情失去信心，我曾經聽過一句話：「你可以對你的伴侶失望，但不要對愛情失去信心。因為，魚死得再多，都不會令大海霉掉。」答應我，要過得比從前更好，可以嗎？

3)友情篇
早幾日有個朋友出事了。詳情不用說，當事人和我知道便夠了。無可否認，當晚收到你的深宵來電，我真的很火大。不是因為你把我吵醒了，而是你總是要我擔心。跟你認識差不多十年吧，你其實都沒有變，都係一個表面風騷，內裡自閉的人。收到你的電話，我唯一可以做的就是搵人求救、再等。不過你不用不好意思、不用跟我們說於心有愧，只少不用對我說，你明我的意思吧！無論如何，不要把自己變得更自閉，下次不要遇人不淑就好了。

很久沒有bullshit，一黎就咁大篤，可能你未睇完已經訓著。Anyway，我爆發完畢。總括而言，that’s just life！既然發生了，你就得接受。點解唔開開心心咁面對呢？加油呀！

******************************************************
That’s just life　徘徊到不再徘徊
That’s just life　從來都不怕重來

沒有選擇的時候　無論選擇的時候
永遠向前　路一直都在

p.s. 力仔愛你！